LANNSENTSCHEED "Jungs un Deerns leest Platt 2011"
Negenteihnhunnerteenunachtig, - för dörtig Johren - ward de Hamborg-Welle (hüüttodags NDR 90,3) to'n eerstenmol över de Antenn schickt. Twintigdusend Schoolkinner weren den Oproop vun de Schoolkinnerkomer nakamen un hebbt streikt, wiel dat de niege Schoolentwicklungsplaan dat Strieken vun föftig Schoolen in Hamborg vörsüht; Hans-Ulrich Klose smitt dat Handdoog, Klaus von Dohnanyi ward de niege Eerste Börgermeister un Kurt Behrens röpt den Vörlesewettstriet "Jungs un Deerns leest Platt" in't Leven. Akraat dörtig Johr lesen Jungs un Deerns in Hamborg all twee Johren in düssen Vörleswettstriet. Tweedusendelven ladt dat Schoolamt to'n föffteihnsten Plattdüütschen Vörleeswettstriet "Jungs un Deerns leest Platt" in. Un bi de Landsentscheed an 5. Juni in't Ohnsorg-Theoter doar wer dat Heisenberg-Gymnasium wedder mit dree Mann hooch dorbi. Een Deern un twee Jungs ünner de sössteihn Besten ut ganz Hamborg!
Los geiht dat mit de Tüdelband
So üm un bi hunnert Tokiekers beleevt een vergnööglichen Sündagmorgen op Platt. Los geiht dat mit de "Tüdelbänd", veer swungvulle junge Lüüd, een mit een Bassfidel, de anner mit de Rietfidel, de drütt mit een Teekistentrummel un een smucke Deern de singt "Uwe steiht op Jungs".
Lesen in't Ohnsorg-Theoter, dat is meist wat besünners. Bevör de Deelnehmers losleggen künnt begröt Frank Gruppe vun't Ohnsorg-Theoter jem un all de Besökers. He vertellt, dat düsse sössteihn Kinner hüüt toletzt op düsse Spöldeel lesen. Na fiefunsöventig Johren verlött dat Ohnsorg-Theoter de Groten Bleeken un treckt in Austmaand in't Biberhaus an'n Hauptbahnhoff. In dat niege Huus will dat Ohnsorg-Theoter all de Kinner in twee Johren geern wedder begröten. Denn snackt een junge Fro vun't Schoolamt, de för lange Tieed sülvst eenmoll een Praktikum in't Ohnsorg-Theater mookt het!
De Talkmeistersche is Gerlind Rosenbusch
Un denn güng dat opletzt los, sössteihn Kinner leest ehr Geschichten in de Dekoration vun "Brand-Stiftung" ünner de Ogen vun de sövenköppig Jury. De Talkmeistersche Gerlind Rosenbusch rööpt toeerst de Schoolkinner ut de Johrgäng dree un veer op. Foorts achteran keem de Johrgäng fief un söss. In düsse Johrgäng is dat Heisenberg-Gymnasium dütt Johr nich dorbi. Hannah Behrendt het uns Clara Raut (5b) un Björn Meyer (5c) in Bezirksentscheed in Marmstörp rutsmeten.
Achter de Poos
Achter een Poos geev dat eerst een beten Musik mit de "Tüdelbänd" de nu wat Suutjes singen! Denn leest de dree Kinner ut de Johrgäng söven bet negen. Uns Karsten Meyer (9a) mit sien Geschicht "Sprit - Swartbrennen" vun Rudi Rabe weer de Tweete in düss Köppel. De Geschicht vun de Internet-Daunlot "www.de-plattsnacker.de" is meist wat vör de Keerls, de sik düchtig högt.
De Ölleren
De Eerste in de letzt Köppel weer Henrik Augstein (10a) mit sien Geschicht "Jümmers bi vullen Moond" vun Willi Mühl. Siet de drütt Schooljohr het he mitmokt bi düssen Wettstriet un dütt Johr leest he toeerst bi'n Lannsentscheed. Achteran lesen veer junge Deerns, dree ut Hamborg un uns Inga Schwemin (S4) mit ehr Geschicht vun de Wohrheit vun Irmgard Harder. Twee vun de anner Deerns sünd vun de "Plattdüütsch-Kring vun de School Wildschwanbrook"!
Un denn müss de Jury ran un de tohörers amüseert sik mit de "Tüdelbänd" un ehr "Bottelbreef" - de plattdüütsche Utdüden vun dat bekannig engelsch Leed "Message in the bottle". Dat weer een Spoaß!
Denn drückt de Öllern, Grootöllern, Frünnen un Schoolmeisters noch eenmol ganz fast de Dumen beför Herr von Eitzen dat Resultat künnig maakt:
De Eerste in de Johrgäng dree un veer het Hannah Behrendt vun de School Marmstörp. In de Johrgäng fief un söss heet de Eerste Fine Meier ut Finkwarder, mit ehr Geschicht "De Fro in't Auto", de ehr Modder Anja Meier schreven het. In de Johrgäng söven bet negen het Caja Meier ut Finkwarder wunnen. De Süster vun Fine lees ok een Geschicht vun ehr Modder, "Opa ward Tachentig". In de Johrgäng teihn bet dörteihn het de "Plattdüütsch-Kring" ut Meiendörp dütt Johr de Nees vörn; de Eerste heet Harman Randhawa. Een Deern mit Öllern ut Indien, de siet dat tweete Schooljohr Plattdüütsch lehrt un ok Geschichten för "Vertell doch mol" schreven het. Inga un Henrik hebt höllsch good leest, weren hüüt över meist een beten opreegt! Inga het düüt Johr toletzt för dat Heisenberg-Gymnasium leest, denn ehr Schooltied geiht to Enn.
Wi gratuleert
We seegen "velen Dank" to uns Schoolkinner vun`t Heisenberg-Gymnasium de leest hebbt un an ehr Öllern, Grootöllern un Schoolmeisters de mit jem dat Plattdüütsch leert het. Ji künnen nich jeedeen Johr Winner wesen, över wenn ji dorbi blievt denn starvt uns schööne Plattdüütsche Sproak nich ut!
Plattdüütsch leevt!
Tschüß bet to'n neegsten Johr, wenn dat in de Süderelvruum wedder heet "Schoolkinners leest Platt 2012"!